WALIMU NA WAZAZI KATA YA BUNDUKI WILAYANI MVOMERO WATUSHIA KUFUNGA SHULE KUTOKANA NA UPUNGUFU WA WALIMU NA PESA KIDUCHU ZA ELIMU BURE

Wazazi na walimu wa shule za msingi katika kata ya Bunduki wilaya ya Mvomero mkoani Morogoro wametishia kufunga shule tano zilizopo katika kata hiyo kutokana na shule hizo kukosa walimu na idadi ya wanafunzi ikizidi kuongezeka huku walimu wakuu wa shule hizo wakisusia fedha zilizotolewa na serikali kusaidia mfumo wa elimu bure kwa madai kuwa hazikidhi mahitaji.

Wakizungumza kwa nyakati tofauti walimu wakuu wa shule za msingi Tandari Maguluwe, bunduki , vinile, kibigili, wametupia lawama serikali kushindwa kupeleka walimu wa kutosha huku shule za mijini zikiwa na walimu zaidi ya 20 kila shul huku wao wakiwa hawafiki hata walimu watano tu.

Nao baadhi ya wazazi wamesema watoto wao wanahitimu darasa la saba bila kujua kusoma na kuandika kutokana na mwalimu mmoja kufundisha watoto zaidi ya 400 ambapo wamesema mfumo wa elimu bure kwa wanafunzi haitakuwa na maana endapo shule hizo zitaendelea kuwa na upungufu mkubwa wa walimu.

Akijibu malalamiko hayo kwa njia ya simu Afisa elimu wilaya ya Mvomero bwana Michael Ligola amesema hana mamlaka ya kuzungumzia kero hizo bali anayetakiwa kuyajibu ni mkurugenzi wa halmashauri hiyo ambapo jitihada za kumtafuta mkurugenzi huyo zimegonga mwamba baada ya simu yake kutopatikana.